بقلم/نشأت البسيوني
في لحظة محدش بيسمعها غيرك يطلع جواك صوت غريب صوت مش صوت خوف ولا صوت شجاعة ولا حتى صدى ذكريات قديمة صوت جديد كده يطلع فجأة من عمقك كأنه كان مستني السنين دي كلها علشان يظهر ومحدش أبدا يعرف يوصفه لأنه صوت ملوش شكل صوت بيشبهك إنت بس الصوت ده ساعات ييجي بعد وجع طويل وساعات ييجي بعد صمت أطول وساعات يطلع وانت ماشي
وسط الزحمة من غير سبب وكأنه بيقولك فوق اتنفس ابعد قرب اعرف نفسك تاني شوف الدنيا من جديد ما تسيبش الحاجة اللي بتوجعك تاخد مساحة أكبر من قلبك ما تسمحش لحد يقلل من قوة اللي جواك والغريب إن الصوت ده رغم إنه ساكن جواك لكنه أصدق من أصوات الناس كلها لأن الناس ساعات تبص لك بنظرة مش بتاعتك وتحكم عليك من موقف انت كنت فيه مجروح لكن الصوت
اللي جواك بيشوفك على حقيقتك بيشوف تعبك اللي مستخبي وكسرتك اللي ضحكت عليها وقدرتك اللي فضلت واقفة رغم اللي وقع وساعات الصوت ده يكون ضعيف جدًا كأنك هتنساه وساعات يكون عالي لدرجة إنه يصحيك من نومك ويخليك تسأل نفسك أنا كنت فين وليه سايب حياتي تمشي بالشكل ده وليه سايب قلبي يتعلق بحاجات مش قد المقام وليه سايب روحي تستنى حد مش
بيحس بقيمتها وليه سايب ناس تشوفك أقل من اللي أنت عليه
والأجمل في الصوت ده إنه بيدلك على الطريق اللي يشبهك مش الطريق اللي الناس شايفاه مناسب لك مش الطريق اللي بيديك مظهر براق الطريق اللي بيدي روحك راحة ويخلي خطواتك صادقة ويخليك تمشي من غير ما تحس إنك بتخون نفسك الفكرة مش إن الصوت ده يظهر الفكرة إنك تقدر تسمعه وسط الضوضاء وسط
الكلام اللي بيقع عليك من كل اتجاه وسط الوجع اللي بيحاول يدوخك وسط الأيام اللي بتعدي عليك كأنها واقفة لما تسمعه بجد هتفهم إن أعظم قوة في الدنيا مش إنك تكمل لا أعظم قوة إنك تكمل وإنت فاهم نفسك ولما يبقى الصوت جواك أهدى من خوفك وأقوى من كسرك وأوضح من ضباب الأيام وقتها بس تعرف إنك مش محتاج موافقة حد ولا دعم حد ولا رأي حد لأنك ببساطة
لقيت الصوت الحقيقي اللي يشيلك ويقوّيك ويصحيك على حقيقتك
الصوت اللي جواك…
هو أكتر حاجة صدقها فيك
وأول دليل إنك لسه قادر تبدأ من جديد
حتى لو الدنيا كلها فاكره إنك وقفت.
ليست هناك تعليقات:
إرسال تعليق