تاه قلبي ودوبت من الغربة
مدفون فيها حي كما التربة
ده بعادي يا ناس كان على عيني
بس الأيام آسية وصعبة
وغيابي إن طوِّل عن حده
كام سنة ومسيرهم هيعدوا
وارجع ومعاه تحلى سنيني
ويميل ياسميني انا على ورده
ورجعت وأملي أفرَّحها
لو اغمض عيني وافتحها
الروح وياه تنسى أنيني
ماهي رجعت تاني لمطرحها
كنت عاملها لقلبه مفاجأة
بس الأحلام ولت فجأة
مفتاح الباب مافتحشي يا ناس
والاسم اتشال من ع الشقة
خبطت وكلي ذهول ووجوم
ماهو أمر يحير مش مفهوم
فتحتلي وكان الرد خلاص
زرعت ف القلب جراح وهموم
خلعتني وجابت ليا شهود
إن انا مفقود ولا يمكن أعود
والشقة خدتها عشان حاضنة
وبقيت ف حياتها ماليا وجود
ومشيت وانا ربي بحالي عليم
قلبي بينزف من جرح أليم
مانا ذنبي معاه كان اخلاصي
ووفائي إليه كان جرم عظيم
بقلمي/ خالد جمال ٨/١/٢٠٢٦
ليست هناك تعليقات:
إرسال تعليق