حين يفتح لك القدر باباً لم تكن تنتظره بقلم نشأت البسيوني

حين يفتح لك القدر باباً لم تكن تنتظره

بقلم/نشأت البسيوني 

في لحظات كتير في العمر بنلاقي نفسنا واقفين قدام باب ما خطرش على بالنا يوم يفتح باب جه من غير ميعاد من غير ما نستعد له ومن غير ما نفهم ليه اختار الوقت ده بالذات ساعات بنفتكر إن الحياة ماشية على خط مستقيم وإن كل اللي حوالينا محسوب ومحسوم لكن الحقيقة غير كده الحقيقة إن القدر دايما سابق بخطوة وده اللي بنكتشفه لما ييجي الفرج من باب مالناش 

فضل في فتحه ومع كل باب جديد بنفهم إننا كنا بنتمسك بأبواب قديمة مقفولة لسنين كنا بنستنزف نفسنا ونحاول ندخل منها بالعافية وننسى إن اللي راح مش نقص وإن اللي اتأخر مش ضياع وإن ربنا دايما بيشيل من طريقنا قبل ما يضرنا حتى لو احنا مش شايفين الحكمة ساعتها وبنلاقي نفسنا بنتغير بدون ما نقصد بنتعلم إن مش كل نهاية وجع ومش كل خسارة نقص أوقات الخسارة 

بداية الطريق الصح وأوقات الانسحاب من حاجة كنا بنحارب عشانها هو أول خطوة لحاجة كانت مستنيانا من زمان وحين يدخل في حياتك باب جديد تكتشف إنك كنت بتحارب غلط وتدي مشاعرك لناس غلط وتفتح روحك لأماكن غلط وتغلط في حق نفسك قبل ما حد يغلط فيك وتفهم إنك كنت محتاج الوقت ده كله علشان تعيد بناءك من جوه علشان قلبك يبقى أقوى مما كان 

ووعيك يبقى أعلى من اللي فات وتبدأ تستوعب إن اللي اتأخر جه لما نضجت وإن اللي اختفى اختفى علشان يمهد لمكان أنضف وإن اللي كان وجوده بيحمل تعب كان لازم يمشي علشان الروح تتنفس وإن اللي كنت فاكره سند طلع مجرد جدار هش أول ما الوقت يضغط عليه يقع ومع كل ده تعرف إنك مش محتاج تعد ناس في حياتك قد ما محتاج تقيس تأثيرهم وإنك مش محتاج صخب ولا 

تجمعات شكلها حلو من بره وجواها فراغ محتاج ناس حضورهم راحه وضحكتهم صدق ونواياهم صافية من غير مصالح ولا أقنعة

وتبتدي تدرك إن الحياة مش دايما محتاجة تفكير زيادة وإن بعض الإجابات ما بتظهرش غير مع الوقت وإن في حاجات كانت لازم تتأجل علشان لما تيجي تحس إنها جاية لك مش عليك وإن كل حاجة ضاعت كانت بتمهد للي هيرجع لك بأجمل شكل وفي اللحظة 

اللي تستوعب فيها ده كله هتفهم إن القدر ما كانش بيختبرك القدر كان بيحررك من طرق ما تناسبكش ومن ناس ما كانتش لحدك ومن مشاعر كانت بتحرقك أكتر ما كانت بتدفيك وحين يفتح لك القدر باباً جديدا لازم تدخله بقلب واعي بروح نظيفة بحدود قوية وبثقة إنك تستاهل كل خير وإنك اتكسرت عشان تتعدل واتأخرت عشان تتقدم واتبهدلت عشان تبان قوتك الحقيقية وفي آخر الطريق 

هتعرف إن مافيش باب بيتفتح بالصدفة وإن اللي جاي ليك مش هياخده حد غيرك وإن النصيب لما ييجي ييجي كامل نضيف ثابت ما يتزحزش واللي جاي أجمل بكتير مما راح لما تمشي في الطريق اللي القدر اختاره ليك مش اللي أنت كنت بتحاول تفرضه عليه