بخاف على عشقي من بكره
دي لو كانت يدوب فكرة
على هوانا يكون ذكرى
لأشواقنا تقوم آخرة
نعيش للحزن يوم أسرى
نموت م الجرح والكسرة
وتشكي قلوبنا م الحسرة
على الحب اللي فاض سيله
وروَّى قلوب كانت صحرا
تعوق سريانه كام صخرة
على القلب اللي عاش ليله
ف فرح معاكي ومسرة
تروح ويعيش سنين مُرَّة
على العشق اللي خدنا إليه
ودوبنا سهر لياليه
وليد فينا نكبَّر فيه
بأرواحنا نحاجي عليه
يموت بينا
ويبقى ف يوم عظام نَخِرة
زمان قالوا دوام الحال
ده أمر محال
وفرح العمر مهما ان طال
أكيد لزوال
لكن شوقنا
ساكن ف قلوبنا وعروقنا
وبيه وحده يدوب خوفنا
ده مهما من الوجود شوفنا
هنغزل بكره على كيفنا
ونبض القلب لو يفنى
ده ف الآخرة
هاكون فاكرك ومش هنسى
عشان قلبي أسير همسة
عشان روحي دي بيك حاسة
لو انتي يا عمري نسياني
وروحك ليا مش فاكرة
محال حبك يكون ذكرى
بقلمي/ خالد جمال ٦/١/٢٠٢٥
ليست هناك تعليقات:
إرسال تعليق