ياحنين وفارش ضله ع السكه
والناس علي السكه دى..
ياما تفوت..
فرحان كأنه راح علي مكه..
ليه الأماني في عز بوحها تموت؟؟
وليه غناوى المجروحين في قلبهم
يطلع صداها سكوت ؟؟
وصت علي عيونها تسحرني..
وصيت عليها ملايكة الملكوت.
...... ....... .....
طالت ليالي الوحده والغيبه
وانا وحدى عايش ..
بين حيطان الروح..
كان نفسي تبقي حبيبه وقريبه
مش غنوه اغنيها بصوت مبحوح
اديتها قلبي في منتهي الطيبه
ادتني قلبي منكسر ..مجروح
...... ....... ....
انا عشت ازرع لك غيطان الأمل
قدام خطاويكي فرشت ورود..
حصدت مر وصبر..ايه العمل ؟؟
مالقيتش روحي..
وقلبي مش موجود..
حلمت بيكي حلم لم يكتمل
صحاني من حلمي..برود وجحود
ولا عمرى نمت في ليلة متهني
لكن راح افرح..لو أتاني الموت..
وصيت يكون النعش متحني..
زى العريس..وسط الصحاب
راح افوت.
............. ..........
شعر/نصر سيد بدر..القاهره
@إشارة
ليست هناك تعليقات:
إرسال تعليق