ليه تقضِّي عمرك في الأحزان
ليه تكتئب وتعيش متوتر
ده كل شئ محسوب بميزان
على الجبين مكتوب متسطر
وكل ليل له فجر يبان
لو غيِّمت بعديها بتمطر
ربك خلق في الدنيا وزان
علشان تعيش مش تتكدر
كوبايه لو نصها مليان
ليه تشوف عنيك نقص مسيطر
لو بحر هاج أمواج فيضان
هتشوفه يوم ماشي يتمخطر
لو ريح كمان غطى الأكوان
جاى النسيم صافي متعطر
ارضى بنصيبك مهما ان كان
على نعمته ليه تتبتّر
ده الحمد شرط النعمة دوام
ربك يزيد فيها ويكتّر
بقلمي/ خالد جمال ٣/٣/٢٠٢٦
ليست هناك تعليقات:
إرسال تعليق