ماتستاهلشي دموع ف عنيك
ولا حتى يوم تشغل بالك
إن انت تِقلِق حد عليك
او يسألوك جرى إيه مالك
حزنك وخوفك يبقى ماليك
والدمعة تسكن موالك
زعلك ف يوم على شئ كان ليك
فارقك وغاب زي ما جالك
وغرام ف يوم كان سكنه عنيك
هجرك وعاش بره مجالك
وحبيب عشقته وقلبه نسيك
ما صعبشي لحظة عليه حالك
وقريب ف همك يشمت فيك
ما بقاش لا عمك ولا خالك
انسان أمنته ما أخلص ليك
باع بالرخيص عهدك خانك
واللي ف شقاه مديتله ايديك
يوم فرحته نكرك شانك
وصديق قصدته عشان يديك
خذلك وزاد من حرمانك
واللي لمصالحه بيبلف فيك
ويقول كلام يملى ودانك
تأمر سيادتك شوف معاليك
ولو انقضت ولَّى زمانك
واللي افتكرته يداري عليك
فضحك وهد ف أركانك
وحاجات كتير لو حصلت ليك
ماتستاهلشي يضيق حالك
صبرك على اللي أذاك مداويك
في الآخرة هيزيد أعمالك
بقلمي/ خالد جمال ٥/٣/٢٠٢٦
ليست هناك تعليقات:
إرسال تعليق