جيت هليت على قلبي نسيت
كل جراحي وكل الحزن
بعد ما كنت لعشقي طويت
قلبي فتحلك تاني الحضن
لما ندهت عليك رديت
رديت فيا الروح للغصن
مانت يا واد فقت وعديت
كل حدود الناس ف الحسن
لو لفيت الكون يا جميل
عمري ما هلقى ف حسنك حد
عين بتداوي ف قلب عليل
رمش يبوح للروح بالوعد
جفن يشيل م القلب عويل
يقضي على الأحزان ويهد
شعر معدي سواد الليل
خال بيشاغل ورد الخد
قد يا واد ملفوف ونحيل
خطوة بتحلف بيها الأرض
خصر كمانجه يقول مواويل
يشجي الروح بالطول والعرض
دانت يا واد ف الشوق عنتيل
جيت وأمرت الروح تتشد
جيت وشعلت ف قلبي فتيل
قضى ع الصد بنار الود
والخوف شفته في لحظة قتيل
بعد ما كان ف الروح بيمد
قبلك كت دمعتي بتسيل
زي بحور ليها جذر و مد
دمعة وهدت فيا الحيل
مهما امسحها تزيد وتجِد
جيتني نسيت شكل المنديل
دمع عيوني اتبدل سعد
برقك ضوى ف ليل وسديل
عشقك شال من قلبي الرعد
أجمل وعد
بقلمي/ خالد جمال ١٩/٤/٢٠٢٦
ليست هناك تعليقات:
إرسال تعليق