ياللي سقيتني المُر بايدك
كان ايه ذنبي وايه هيفيدك
وانا فكَّرته اكمني بريدك
شهد ودايب من عناقيدك
اتاريه جرح وويل وعذاب
ياللي مليت من دمعي كاسات
وغزلتلي م الأسى مقاسات
كنت ف ايدك شوق بيريدك
وأنت هواك خد مني راقات
عشت معاك ف خداع وسراب
ياللي هواك كان غلطة عمري
ومعاك شفت نجومي ف ضُهري
ياللي ف ليلك غاب نور بدري
خدت معاك الطعنة ف ضهري
وما همكشي عذابي وقهري
بعد ما قلبي ف حبك داب
بكره الوقت بسرعة هيجري
والليل مهما ان طال جاي فجري
هنسى آلامي ويرحل ضَجَري
والطير اللي معاك فات شجري
بكره هيرجع لِيه من بدري
وانت هتبكي دموع على هجري
على خدك تجري وتنساب
بكره عذاب
بقلمي/ خالد جمال ٢١/٧/٢٠٢٦
ليست هناك تعليقات:
إرسال تعليق