بتاريخ 30/3/2021
قصيدة ( كوارث )
بقلم الشاعر المصري أحمد إبراهيم النجار
كتابك كوارث
وفيها الضمير
مغرّب ضرير
وكاسي السواد
كوارث حوادث
في صفحة مداين
فى صفحة نجوع
وتعلب وفات
خضار المزارع
اصبح رماد
شهيدك رضيعك
بيبكي ف سكات
حليبك ضميرك
هو اللى مات
يا غنوة حزينه
وكورس موسيقي
بيعلى بأهات
وتحيا وتحيا
وارحل في داهيه
ماليش اعتبار
في بحرك فى شطك
فى قطرك فى دربك
فى قربك فى حضنك
وتطلع شهادة
وفاتي فنائي
واسمي ده ذكرى
ف شهادة ميلاد
ومين الشهيد ؟
مجرد بواقي حطام السنين
مشرد مغرّب
ف عكس الطريق
لعمري قبلتك
فى لحظة شروق
ودايق مرارك
ومكسي بنارك
وعايش في دارك
واحد غريب
والعن ظروفك
حروفك وخوفك
خضوعك وموتي
فى كل الموانى
واحد شريد
شهيد الحديد
ونار الحريق
ركام المبانى
وكل اللى راقص
بيعلى بنشيد
تحيا وتحيا
تحيا وتحيا
وابني اللى مات
فى لحظة فجور
وترقص صبايه
وتهتف تزور
ضريح اللى ماتوا
ف لحظة سكات
صراخ اليتامه
وصرخة بنات
ظلامك ونارك
بتحرق قلوب
ماليها الجروح
بعيشك فى موتي
فى لحظة سكوتى
فى ايدي الحديد
بعيشك كبوس
وبحلم ادوس
غروبك وافوت
ده ليلك قبيح
وبالع شروق
بعتمة شطوطك
بصمتك وقربك
لكل اللى باعك
ومكسور شراعك
وموجك عنيد
فيكي اللى عايش
وفيكي العبيد
بتحلم تغنى
غنوة ضمير
لا رقصه فى بار
وضحكة فجور
بتكسي ملامح
خافيها الخُمار
كوارث حوادث
ولسه كتابك فيه الكتير
ولسه الضحايا
ولسه الفصول
بقلم الشاعر المصري أحمد إبراهيم النجار
ليست هناك تعليقات:
إرسال تعليق