قالوا زمان في المثل
تحياتي
محمد ياسين
قالوا زمان في المثل
لو كان حبيبك عسل
ماتلحسوش كله
لكن حقيقة المثل
لو كان حبيبك عسل
روح له وكمان قول له
فضفض وبوح وارتوي بالحب من قلبك
شوف اللي باعك مين أو مين في يوم حبك
خليك مع اللي انكوى واتمنى يوم قربك
قلبه الكبير عايش للحب هايدله
سهم الغرام لو صبته هايصيبك
خلي الكلام بعدين واجري على حبيبك
اياك تسيبه يروح لو سيبته هايسيبك
والحب من قسوتك هايبيعه ويزله
القلب طبعه غريب دايما وليه أحوال
يا قلب ليه الهوى أصبح غريب الحال
اصبحت ليه مختلي وبتعشق الترحال
لو تاه حبيبك هلك وشيطانه هايضله
لما يناديك الشوق قرب ماتبعدشي
فكرك يبات مشغول وعنيك ماهتنامشي
لو حتى خلك بعيد وساعات مايسالشي
اركب حصان قلبك وبسرعة اوصل له
ارسم حبيبتك في حلمك صورة م الجنة
واسرح بعقلك بعيد من قلبك اتمنى
ادفع تمن حلمك م العمر واستنى
ماعدش فيه حلوين يا خسارة بيقلوا
بحر الغرام متاهات لازم تكون بحار
عافر في وسط الريح واضرب مع التيار
طبع الحياة قلاب وساعات كتير غدار
لو مرة موجك طلع انت اللي تنزله
شايفك ياليل بتهل ع الصحبة والعشاق
ولكل قلب وليف دايب من الأشواق
الدنيا بينا تلف والناس تعيش في سباق
دور في يوم على قلب حبك وتستاهله
اعشق وحب وعيش وانسى اللي يوم باعك
اقفل بيبان الحزن واقتل كل أوجاعك
اضرب في أرضك وتد واسند على شراعك
خلي اللي سابك في يوم يتهد من غله
من غير كسوف ولا خوف ولا هري ع الفاضي
على ايه نعيش نكره وف بعض بنعادي
احلى الكلام والقلب على خله من شوقه بينادي
صفوا القلوب وافرحوا واتهنوا واتسلوا
دور ما بين الناس على قلب نفسه يعيش
حضنه الكبير يخطفك م الدنيا والألاضيش
يفضل معاك ع الحلوة والمرة
يقسم معاك العيش
وتكون حبيبه وفرحته وضله
قالوا زمان في المثل
لو كان حبيبك عسل
ما تلحسوش كله
لكن حقيقة المثل
لو كان حبيبك عسل
روح له وكمان قول له
ليست هناك تعليقات:
إرسال تعليق