بحبك حب دوبني وغلبني
وقلبني على الجنبين
بحبك حب شنكلني وشقلبني
ونساني خلاص أنا مين
وباعشق نفسي قدامك
وباسرح جوا تفاصيلك
واكون نجمة ف سواد ليلك
وشايلك صورة يا حبيبتي ف حبابي العين
غيابك عني بهدلني
وبعدك زود التنهيد
وليه القسوة شيء عادي
وليه نكره وبنعادي
ونهرب ويا ناس تانيين
بننسى الماضي والذكرى
عشان فجأة القلوب ضلت
ويصبح عادي لو بكره
سرقنا الشوق مع العاشقين
قصادك بانسى كل الناس
وباسرح جوا أحلامك
وازين كل أيامك
واكون فارس يصون عرضك
من الأندال
واكون درويش في ملكوتك
واتوه واغرق مع التايهين
بحبك حب أنا نفسي محبتهوش
وأول مرة احس بشوق
محستهوش
وادور في الوشوش عنك
ألاقي البدر متخفي ف جمال سنك
وقلبي ليكي كله حنين
أبوح بالسر لعنيكي
واقول كل اللي جوايا
وانا براحتي معاكي وبس
أخاف طول البعاد يسرح
ومش مكتوب لي ليه أفرح
ولسه بجد مش عارف
آخرها لفين
ألف الكون عشان خاطرك
واسيب كام ضحكة للذكرى
واسيب صورتك في قلبي دليل
أطيب جرحي بوجودك
يا أغلى ف قلبي من ملايين
حروف اسمك شعاع في الضلمة بينور
وكل ماتوه واغيب ثانية
ترجعني الحياة ليكي
يا أجمل صورة في البرواز
هاعيش في البعد واتحمل
سنين وسنين
سرقت من البشر حكايات
وعشت كتير أغنيلك
سراب في القلب بيخيم
وحلم ف عز برد الليل
مالوش تفسير
وخيط ابيض
في آخر سكة المجهول
بحبك مش نفاق ولا كدب
وعمري ماكنت انا بوشين
يا صابر صبر على صبرك
عايزلك صبر بيصبر قلوب صابرين
يا عاشق وقعتك بيضة
وسكة قلبك الخالي
ماليها الشوق
هاتعمل ايه
تكمل واللا راح ترجع
بقلب حزين
يا سارح في الألم والآه
ونبضك لسه شوق وحياه
طريقك مهما تتألم
ومهما الموج خطف حلمك
هاتلقى ف آخره شط نجاه
يدوب قلبك مع الدايبين
خسارة عمرنا الضايع
في قلنا وقال
خسارة حلم في نهايته
نفوق على وهم مايكفيش
وقلبي وقلبك الدايب
نعيش بالفرحة مش حاسين
حبيبتك لسه طير مجروح
عليها القصد والنية
ولما ف يوم هاتتأكد
وتعرف مية في المية
بلاش تبخل وتتردد
وفضفض بالأمل تاني
وعيش الفرحة واقسمها
على القلبين
يا ليل الحيرة ما تفارق
ومن إمتى البعاد فارق
ومن كتر الوجع دُخْنا
صاحبنا الآهه والتوهة
وسيبنا العيشة للعايشين
تحياتي
محمد ياسين
ليست هناك تعليقات:
إرسال تعليق