أنا المهموم
تحياتي
محمد ياسين
انا المهموم وانا الموهوم
انا الظالم وانا المظلوم
انا الموجوع وانا المخدوع
وانا التايه في بحر اللوم
انا البايع وانا الضايع
انا الباير وانا الحاير
في اوهامي اللي هدتني
وشدتني ومدتني على جدوري
انا المجهول وانا المعلوم
وانا العايش ومش عايش
ساعات عاقل ساعات طايش
واحيانا باكون واضح
وغامض لما باتألم
ومش مفهوم
وفرق كبير ما بين انك
تعيش تايه في ملكوتك
وبين انك تكون سارح
وقدامك لبكره الجاي
الف طريق
ومش قادر تكمل برضه وتعافر
ورغم المحنة
بتأكد لنفسك كل يوم
انك في مشوار الأمل رحال
بتبدا رحلتك خطوة
وخطوة تجيب كمان خطوة
بخيل على قلبك المجروح
يعيش مرة
في وسط الحلم متهني
وايام الجفاف مدت على قلوبنا
خيال الزيف
يا عيب الشوم
يا احلامنا اللي لسه ماجاتش
ومن كتر الألم اضحك
وسيب للدنيا مية موال
ومش راجع
ومش قلبي اللي يفضل بالأمل
ضايع
عشان مش لاقي نبض حياة
يجوز تكدب وتتدارى
وتفضل ذكرى تتعلق
على حائط بطولاتك
فترجع تحسب المشوار من الأول
وتفرح مرة بسذاجتك
ومرة تقلب الماضي
ومرة تجيب من الآخر
ومرة تتوه مع الحاضر وتغرق
ويا بكره الجاي
ملامح وشك الدايبة
حقيقة عمرك الضايع في كدبة
بتتولد بالقصد
هاتخلص برضه على ايدك
وياما كتير من الحكايات
بتتعلق على الحيطة
وتصبح نزوة أو صدفة
لكن علشان انا المهموم وانا الموهوم
وانا الظالم وانا المظلوم
لاقيت قلبي على جدار الألم
مصلوب
وفقت لاقيت
ميزان العدل بين الناس
صبح مقلوب
ودنيا على القلوب بتحوم
مانيش ندمان ولا مصدوم
خلاص هاغرق مع النسيان
في بحر غويط
وهانسى الحيرة وسنينها
ومش علشان تعيش طيب
يقولوا عبيط
ومش علشان تكون ساكت
وجوا الجرح متداري
يقولوا حويط
خلاص بكفاية
ملينا وكفينا وفاض بينا
وخلينا اللي باع فينا
لنفسه الوحشة تاكل فيه
ليست هناك تعليقات:
إرسال تعليق