رحــــــــــال
لفيت بلاد الله م الجيزة للنوبة
عشمان في نظرة رضا أو توبة مكتوبة
أنا خدت منك في راسي طوبة ورا طوبة
بالرغم من ذلك باقول الله
أصل الحكاية مش حكاية هجر واللا بعاد
أحلى ما فيها بجد إنك تلف بلاد
يحلى اللقا فيها حتى البعاد بمعاد
بعد الفؤاد ما يكون تعب أو تاه
هوا القدر مكتوب علينا نغني بالمواويل
وف حبك انتي يا ستنا نعشق يا عيني يا ليل
طب سيبنا ايه غير الغنا والزمر والتطبيل
أو سيبتي ايه للقلب لو مرة داب في هواه
يام العشم والغشم واللعب في الضايع
مابقتش ليه فارقة مين شاري مين بايع
والجو حتى هواه أصبح تقيل مايع
والبحر موجه عنيد غرقنا ليه وياه
شهد الكلام علقم والمر أصبح دوا
انا نفسي أتنفس من روح غرامك هوا
نار الحروف قايدة بيت القصيد انكوى
وانا لسه طفل عنيد باتمنى فيكي حياة
سميت عليكي كتير بسم الله يا ماشالله
من نور جبينك سحر اسم الله ع الطله
ليه لما بامشي واغيب ترميني مية قلة
وسايبة ليه الوجع مرسوم في قولة آه
يام القلوب مؤمنة بالصبر في الملكوت
حواديت في حبك تعيش
حواديت كتير بتموت
وانا آخرة المشوار هاعمل لقلبي تابوت
واشحت قلوب تدعي وتقيم صلاة لله
شايفة الحروف تايهة والقلب لسه حزين
من غير سبب تدبل ورود الحلم في البساتين
طب مين يكمل غنوتك ويسطر الدواوين
أو مين يخلي الطير يعود لسماه
انتي اللي حبك عمل جوانا ميت حالة
نعيش ونموت وفي الحالتين بنفضل برضه رجالة
وحالة ف حالة وهمومنا دي جوا قلوبنا رحالة
ان كانش حبك فرض مكتوب علينا نحب بالإكراه
ان كانش حبك فرض مكتوب علينا نحب بالإكراه
رحال
تحياتي
محمد ياسين
ليست هناك تعليقات:
إرسال تعليق