أجمل ما شافت عين
(الشاعر رضا البوشي)
هب النسيم ونام على غصنك
ياللي روايحك حته م الجنه
غصن السلام مزروع على ارضك
والحب طبعك منقوش على الحنه
دابت قلوب الأحبه كلها في حبك
يا حلوه الحلوين من دقه
أجمل ما شافت عين
يا كاتب التاريخ اكتب مصر
في أول الصفحه
واكتب كمان عن شعبها الجبار
ام العيون صاحيه
فوق المحال بتخطي جبل الممكنات
حتى الزمن والكون قدامها كالنمله
أجمل ما شافت عين
راضع انا حبها مع لمه الاحباب
يا حلوه يا للي جمالك حير الخطاب
شمسك عفيه وشابه زي ما قال الكتاب
ياللي حروفك سيف بتموت
على صدرها الخسه والإرهاب
أجمل ما شافت عين
غني النهار على كتفها ورقصت رجول الخيل
وعيون حبيبتي السكره سمرا بلون النيل
لو تهت في العنوان وقلت انا مصري
الدنيا من نفسها راح تشيلك شيل
أجمل ما شافت عين
لو علقولي المشانق وجلدوني ميت جلده
انتي اللي فيهم قمر عيني عليكي بارده
تهواكي كل الاماكن حتى البحور الميته
والكل زوارك فاكرينك الكعبه
أجمل ما شافت عين
يا جميله زي القمر والكل حسادك
كل نجوم السما واقفه على بابك
عارف ان البعد جفا والحزن بيعدي
لكين بشوف الموت في بعادك
أجمل ما شافت عين
صوابعها أحدث دوا يمسح جليد الحزن
واطير لسابع سما لما تاخذني بحضن
ستي وست البلاد قمرايه ست الحسن
يحلو صوتي لما اقول يا مصر
ولساني قبل الفؤاد لحضنها بيحن
أجمل ما شافت عين
ليست هناك تعليقات:
إرسال تعليق