تليفوني رن
سكينة الشريف
مصر
ـــــــــــــــــــــــــــــــــــــ
تليفوني رن
ورنته
طبطبت علي همومي
وقالتلي بنت جميلة
وحبيبتي من يومي
انا رايحه أزور الحبيب
مش عايز منه حاجه؟
او تسأليه ياخالتي عن أي حاجه؟
وآآآآآه وزيها ألفين وأزيد
عليهم ألف
صبحوا تلاتة
ومن الأماني بكل صنف
وباشيتاق أنا بعشقه
وأول منايا رحتله وقلتله..
يجمعني بيك يا الحبيب
وبدمعتي اللي اتكوت بيها الخدود
وشقت طريق من العيون لكل جدب
ونزلت بطولي دمعتي عالأرض
نبت الخضار
طرح العمار
وشفته أنا برؤيا المنام
وكسيته بياض التلج
وغاص في صدري وقتها
و بكت السما من وضعنا
ونزل المطر غسل الذنوب
وحبيبي لسه ببدلته جوه الضلوع
رواني من عطش السنين
وشبعت انا من كل جوع
ومن وقتها يابت
سنين طويله ما شفته تاني
ولا في أي ليلة.
هوه أنا أذنبت ذنب؟
يبعده عني بعيد
ويمنع هواه عني في براح الاحتياج
قُوليله يابت دي خالتي بشر!!
وانت اللي قلت خطائين
والتوبه جاهزة مستفه
وبذق فيها للسما بالقلب ذق
وانت ياخير البشر
كن لي وسيط
عند مليك مقتدر
وهات إيديك يا حبيبي
خد توبتي وضم عليها الكف
لجل توصلها للسما
وتكون وسيط يقبلها مني توبتي
واغزل أنا من نور جبينك فرحتي
ياقلب روحي والحشا...
دايبه صبابة ياحبيبي وبعشقك
وفي سجودي
وبصلاتي دعوتي.
يجمعني بيك في جنة الإله
ويا شلة الأحباب
واتنين تلاته من الصحاب ضربتهم وطرحت منهم الخاينين
فكان عددهم ألف
نكون سوا برفقته
وبالريان من جنته يسقينا
بإيديا شربته
فشق الضلوع وبان الخير
وطرح من الحسنات سنابل مالها حصر
ادعي لنا
يكفينا شر الإحتياج
يابت روحي وترجعي بألف
خير وصحة وسعادة
والمروة ويا الصفا راح يشهدوا
عدالخطى
ويكتبوا انك تعديت الصعاب
لجل جزء من العبادة
وركزي وانتي بتحكي معاه
وتبلغي مني الرسالة
وأوعي تنسي في زحمة فرحتك
تبلغي دعوتي
واوعي كمان تنسي السلام
او م اللي قلته ليك أي حاجه
وإن عرفتي تطلبي منه يزورني
مرة تانية في المنام
والا أقولك هو عارف كل حاجة
ليست هناك تعليقات:
إرسال تعليق