عم بشتاق ( شعر غنائي )
عم بشتاق لأيام الماضي
أيام زمان ...
عم بشتاااااق
عم بشتاق للحارات العتيقة
للعبة التخباية من ورا الحيطان
عم بشتاق
لرجعة بيي في المسا من الغيطان
حامل دفا ، حامل غفا
حامل سعادة وهنا
حامل سفينة أمل
رسيت على الشطآن ..
عم بشتاااااق
عم بشتاق لريحة خبز أمي
ريحة طبخة الجيران
عم بشتاق
عم حن لأيام الصبا ..
قديش كنت صغييييرة
معبية أحلام ..
عم أسمع صوت بياع الحلب
بياع زمااان
عم يعووود فيه الزمن
عم يعود ...
مريول ، وشنطة مدرسة
وبنت شطووورة
معبية فرح ، معبية ألوان ، معبية
حب وسلااااام
معبية إيمان ..
عم حن لمشاوير ستي ،
وكياس الهدايا
عم حن للدفاتر للأقلام
عم دور ع رفقات الطفولة
عم بسأل الدكاكين القديمة
عن بيوتهن ، عن الأخبار
عم بشتاق لبيوت لمتنا
أوقات ضحكتنا ، غنوتنا
ورقصتنا ..
عم دور ع الزمااااااان
عم حن ..
عم بشتاق
تمام يوسف / فلسطين
ليست هناك تعليقات:
إرسال تعليق