1_ ماندمت يوم على حبي ليك
ولا مرة لمت احساسي
2_ المكتوب مقدرلي نعشق فيك
سيف عليَ رجعت عز ناسي
3 _ من دوم كل الرجال قلبي باغيك
لكن البعد كان عليّ قاسي
4 _ ترجيت الخالق يقربني ليك
ومن كثر الرجا تقطعت انفاسي
5_ ياريت الزمان يشفق وانجيك
و على كتفك نحط راسي
6 _ نقول هذا محبوبي ونفخر بيك
بالفم المليان نكشف احساسي
7 _ للمولى رفعت يدي داعية ليك
ترجعلي يالغالي و تاج راسي
8 _ نرقد هانية فرحانة نساميك
بعد ما حرم عليّ انعاسي
9ـ نكمل حياتي متونسة بيك
والورد ينبت ويخضار غراسي
10ـ يادرى يلحق النهار ونلاقيك
تشطن حالي كيفاه نواسي؟
11ـ ياربي اسمعني نترجى فيك
خلاني وحيدة في غيابو نقاسي
12ـ اسمع لكلامي مانكذب عليك
كي نلمح خيالك يزيد هواسي
13ـ اتّبليتْ بحبك نشوف غير ليك
ولا واحد غيرك زعزع ساسي
14ـ ماظنيت العشرة تهون عليك
تخليني وتكون لاسمي ناسي
15ـ تمنيت الموت تجي وأنا بين يديك
مانحمل الفراق والله قاسي
16ـ قالوا خليتني شكّوني في حكاويك
بلي انسيت أيامنا وانكرت باسي
17 ـ كواتني الدمعة والقلب هاويك
ماقدرت نصبر زاد وسواسي
18 ـ سباب هلاكي قلبي شاتيك
يام بقيت ليالي ساهرة براسي
19ـ حسبتك وافي ما اديتها فيك
تخليني علكة شيبوني ناسي
20 ـ ما امنت كلامهم استنيت
خطاويك
تبقى يالغالي تاج راسي
21ـ ياك قلت لي للحلال ناويك
شادة في ربي مانقطعش أياسي
22 ـ نختـم بالـصـلاة هـذا حــديــثي ليك
على سيدنا محمد نعطر انفاسي
(نص باللهجة الجزائرية 🇩🇿)
بقلم/ همسة بوزيدي/ الجزائر
ليست هناك تعليقات:
إرسال تعليق