كان زمان (531)
.............
ونهيت خلاص
كده حب كان
وتقوللي وقتك
كان زمان
زمان وضاع شبابي فيه
والسن فجأة بان عليه
ما بينا ليه الغصن جف
ما عاد فيه ضل
والنسمه إن عدت حاسينها
خريفها هل
لا قدرت ترسم
طوق أمان والحب بان
ما لوش مكان
بقى بعد شوق
وسنين غرام
سجنت عمري
تقول حرام أبكي عليه
دلوقتي بتحسب
عمري أيه
ونسيت في العد
أديت لك أيه
زرعت لك بستان ورود
وفى حضني
ربيتك زمان
أخضر يا عود
كان عشق
دايب في الوريد
وغرامنا عشنا نكمله
أحلام وعود
أتاريه خداع
والقلب بان حسه الكفيف
دقه لا يعرف يوم هوى
ودموعه زيف
وعرفت ليه إخترت أنا طريق بعاد
وهعيش وحيد لذكرى
حب إنتهى بشريط حداد
بقلم .. صبري رسلان
ليست هناك تعليقات:
إرسال تعليق