إِتكّعبلت
ف طرف زماني
وهو بيجرى ورايا
وقعت
وإتبعتر من إيدي
أماني
كُنت واخدها معايا
قُمت
ومن ورا شيش الوحده
مفيش بثواني
بأبُص
لمحت ف كفي
بواقى سنين
محجوزهّ
كُنت شايلها
لوقت العوزه
والكف التاني
حنين بيئن
من زحمة
مشاوير الويل
م عِرفش ساعتها
الرمش
يهش طيور الخوف
من علي نن العين
بقى واقف قدامها
مسّهم
وسايبها تزنّ
حتى القلب
الخايف
واقف زيّه مسّلم
شايل هم تقيل
من تآويل الفكر
وسارح
ف خيال
مش فاضل منهُ
غير ذكري
وصورة رسم إمبارح
حتى الحلم اليائس
لابس توب القهر
ومّرمي
ف حجر جروحي
حِزنت روحي
بكيت
إتمنيت
لو كُنت مسكت
ف ديل الليل
وبقيت
من محاسيب الود
إتعّكزت قليل
على صبري
وقولت ياريت
تتمدد م بيني
وبين أحزان الوحده
مُعاهده
هيّاتسيبني لحالي
وأنا أهّدا
وأّلمِ اللى إتبعّتر مني.........!!!!!!
شعر
صلاح محمود عفيفى
ليست هناك تعليقات:
إرسال تعليق