على غير المتوقع يعني
وعلى غير النهج المألوف
حاجة غريبة بَقت تحصلّي
وشئ مش فاهمُه ولا معروف
كل ما أحاول أكتب حاجة
بتاخد مني وقت كتير
حاسس إن العقل إتوقّف
عاجز يعني عن التفكير
جايز ده من كُرهي لنفسي
أو من كتر الضغط النفسي
كل ما بكتب كلمة أنا يعني
بجد بحس ناقصها حروف
على غير المتوقع يعني
وعلى غير النهج المألوف
مش عارف على غير العادة
وخداني الخطوة لفين معها
أفكاري يعني المُعتادة
مش عارف أصيغها وأجمّعها
والفكرة بتبعد من تاني
وحروفي تملّي مخصماني
ومعاني الكلمة وحشاني
وبجد عليها أنا ملهوف
على غير المتوقع يعني
وعلى غير النهج المألوف
حاسس إني بجد مش إني
وإن دي حالة جديدة عليا
اللي شاغلني ومجننّي
وخلّى الدنيا سواد في عينيا
إن أنا يعني مانيش متعوّد
يوم عن يوم في كتابتي بَزوّد
ماشي بفكر ونهج محدد
بكتب بدل الكلمة أُلوف
على غير المتوقع يعني
وعلى غير النهج المألوف
بقلمي عبدالحميد وهبه
ليست هناك تعليقات:
إرسال تعليق