"""""""""""""""""""""""""""
رديتى لقلبى إعتباره
بعد طول ليله ونهاره
بعد ما طال إنتظارى
ف حيرتى وف لهيب نارى
رجعتى للقلب
إللى ضيع فى هواكى سنين
رجعتيله
بعد ما غيرتى نبضه أنين
مش ها نتكلم ف ماضى فات
ولا ها نتألم لجرح مات
عاشق جمالك
ماف يوم نسيته
ياللى غرامك ذلنى
ولا يوم سليته
وأقول لقلبى حرام عليك
أنا إنتهيت
إنسى غرامها
راحت لحالها
يقوللى أبدا
دا طريقى إللى بديته
وها ييجى يوم
ع الغريب يرجع لبيته
قلبى كان حاسس
إن هاترجعيله
وتقيديله شموع فى ليله
جيتى النهارده
تنورى لياليه
وتخلى فرح الكون
الليلادى ماليه
يرقص
بعد ما نال المراد
ورجع الوداد مجاريه
يروى
عطش السنين إللى فاتت
ويداوى جراح الروح
بعد ما دبلت وماتت
رديتى فيا الروح
وليلى أصبح نهارى
بعد ما رجعلى إعتبارى
وولت سنين النوح.
من ديوان
حب من طرف واحد
شعر / سيد فتح الله
ليست هناك تعليقات:
إرسال تعليق