بستنى قدومه أما يعدي
وإن شافني بيبعد يدّارى
ماعرفشي أنا إيه وياه ذنبي
يعاملني بجفوة وبمرارة
بتشد يا ناس لو فات جمبي
وده قسوة قلبه كما حجارة
وفي عز البرد إن قربلي
تحرقني النار زي سجارة
بسقيه من سيل عطفي وحبي
وساقيني هواه بالقطَّارة
ولا عشان جاي معاه دوغري
يلاوعني يفكّر دي شطارة
ف الشارع وقفتي من بدري
مشتاقله بلهفة وبحرارة
لو حس وراه خطوة رجلي
بيسيبه وينفد م الحارة
وبتني وراه ولا روح شغلي
ما عنيه صايداني بسنارة
قررت أنهيها معاه وقلبي
ماهو إما يا فيها ليتوارى
وصارحته فقاللي أنا ايه ذنبي
مانا ردي عليك كان بإشارة
لو ركزت شويه في رمشي
كت ليك هتكون أحلى بشارة
كنت بعبر لك عن حبي
بغمز من تحت النضارة
بقلمي/ خالد جمال ٢٥/١٠/٢٠٢٥
ليست هناك تعليقات:
إرسال تعليق