قوللي بحبك قول يا حبيبي
قولها بصوت بالعشق جهور
قولها وطفِّي ف قلبي لهيبي
خللي العقل يعيش مبهور
شوف من امتى ولا انت داريبي
شوف من امتى بعيش مقهور
دانا متمسك بيك يا حبيبي
لو هتعدي سنين وشهور
لو قلتها هيزول تعذيبي
تِحيِي ف جدب القلب البور
تمحي الشوك م الروح يا حبيبي
تزرع جوه ربوعها زهور
دانا بالغالي شاريك يا حبيبي
وادفع بدل المهر مهور
أي غوالي تهون يا حبيبي
ترخص لاجل عنيك الحور
واصرف كل ماهو ف جيبي
وابقى بصرفي سعيد مسرور
اطلب كده بهواك يا حبيبي
كل مناك شئ في المقدور
كل خيال راح يبقى حقيقي
لو تطلبي لبن العصفور
لو بدَّك م الشمس حبيبي
تفضل ساطعة تشع ف نور
لو قلتلها اشرقي ما تغيبي
هأمر كل العتمة تزول
لو قلتلي نور بدري ف عيني
بيزغللني بضوء مسحور
هخفي الضي بسرعة بايدي
وهيكفيني جبين من نور
كل ده لو قلتها يا حبيبي
هعدِل مايلة وَمِيل معدول
قولي بحبك قول يا حبيبي
قولها بصوت بالعشق جهور
بقلمي/ خالد جمال ١٣/٤/٢٠٢٦
ليست هناك تعليقات:
إرسال تعليق