لما افتكر
دمعة حبيبي عشان هواه
بحس بمرارة
بقول ف نفسي آهين و آه
وألف يا خسارة
مانا اللي أصلي جنيت عليه
وبايدي بعته
كنت السبب ف دموع عنيه
وبقسوة ضيعته
ده عشان براءته لعبت بيه
وكتير لاوعته
شفت الأمان كله ف عنيه
وأنا ياما روّعته
كان لي الدوا وانا كنت لِيه
ألمه ووجيعته
دلوقتي ليه ندمان عليه
بتقول يا ريتني زمان طاوعته
سبت الدهب مارضيتشي بيه
ليه بالرخيص يا قلبي بعته
خنت اللي أمنك وبجدارة
ليه اللي يضعف ف الهوى
بتكون نهايته انه انكوى
والغدر آخره
تلقاه تملي يضيع كده
ويكون كمان كبش الفدا
الخوف طواه والحزن آسره
بيعيش حياته
وجراحه عايشة ليوم مماته
سهران يآسى الليل وآخره
واللي عليه كان قلبه جاني
حب نفسه وعاش أناني
يلقى الندم حواليه محاصره
ياهل الهوى
نصيحة من قلب انكسر
ضاع منه خله وراح هدر
اياك تفرط في اللي قلبه مال اليك
لو ايه حصل
أصل الهوى سلف ودين
لو يوم ظلمت هتتظلم
لو بعد حين
دي الدنيا دوارة
يا خسارة
بقلمي/ خالد جمال ٢٢/٤/٢٠٢٦
ليست هناك تعليقات:
إرسال تعليق