الواد حدوقة بتاع السلاسل
وحموقة بتاع البخور
وخناقة لرب السما
على لهلوبة
اخت المعلم كركور
واحد يقول دى بتاعتى
والتانى يقول انا اللى مربيها
وماحدش يعلم عليا
ومش هعديها
لا حموقة معاة
ولا حدوقة الفقر عايز يسيبة
لا هو ولا حندوقة نسيبة
وعم ظاظا
سمع كلام دبدوبة امها
وهو دة اللى يهمها
وغير كدة يزعلها ويغمها
العيب عيبة
ازاى يوافق ويحط ايدة
فى ايد واحد
لا فى ايدة ولا فى جيبة
واتقدم اللى علية
القصد والنية
وقالوا علية عريس
وجوازة هنية
ابن امة
دونجوان السهوكة والحنية
نوارة اخت قدارة
بنت ام كبارة
خاطبة وماشطة ودلالة وسمسارة
واخدة الفرح من بابة
العروسة والعريس.واهلة واحبابة
قالت دة عريس لوقطة
ونزلت عليها ترف النقطة
هيسكنها ايجار حديث
يامفروش فى الحارة
سمعونا زغروتة
وعقبال الحبايب
الجار والجارة
زقزوقة ام العبيط
بترقص فرحانة
البكرى
اللى كانت منة زعلانة
من كتر ماهلس وفلس
جاب البدلة من الزنقة
والشبكة من عند ظنانة
وام العبيط فرحانة
وكتب كتابة وعلا جوابة
ووزع خروبة وعنابة
لهاليبو الليلة
الفرحة مش سيعاها
صدقت حبيب القلب
للهنا.للغنى.للغنا
خدها ووداها
ومن فقر اهلها
بعدها وعداها
فرح .لهلوبة والدون
مهر وقايمة .بدون
والدعوة فى ابن خلدون
معازيمة
العوكش والحوكش والدوكش
والدوح واطوطة
وحبايب حارة بطوطة
وهيصة وزفة وصواريخ
قال يعنى هيقضى
شهر العسل فى المريخ
وام سوكة .والحاج حوكة
شافوة وهو مروح
راجع يطوح
لا فى ايدة لقمة ولا كسرة
وكان الفطار
على باب محكمة الاسرة
وقالت
ضحك عليا
وعمل من البحر طحينة
وكانت واقعة طينة
وقال
انا مابتعملش بغير
الدولار والدينار
طلع كداب
دة لا هو قادر يصرف
ولا يدفع الايجار
ولا حتة لحمة ولا شوية خضار
كان نفسى اشوف
كوباية لبن على النار
حتى لو فار
عيشة مرار فى مرار
الجواب باين من عنوانة
لا قادر يربى عيل
ولا يداوى عيانة
فين الشفقة.فين النفقة
فين المتعة
نصاب والنصب فى دمة
لاسلم منة خالة ولا عمة
سيجارة وكاس
واذى الناس ولا همة
ساب الدنيا وهرب
العبيط حيلة امة
مين اشترى.مين باع
مين شبع.مين جاع
وطفلة وطفل
فى الشوارع ضاع
مين سبب الضياع
الماسوف على شبابة
طال غيابة
فص ملح وداب
فين الرحمة.وسط الزحمة
بعد ماراحوا الاحباب
قولولى اعمل اية
اخبط على الابواب
ياناس.ياناس
عانس احسن من طالق
وبلاها الجوازة الهباب
بقلمى
محمد يونس
ليست هناك تعليقات:
إرسال تعليق