مش مكسوفين
مش مكسوفين يا لعبه فى السيرك بذيل
راسمين على وجهه الاسد وجواه ذليل
بتغنوا غنوة الجلد ومهزومين
ضيعتوا كيان اتولد على اسما دين
مش مكسوفين
اقلام مدادها النفاق وسطورها حكى الرياء
بتوطوا هامة الكرام وتعلوا اسم الراقصين
الف قصيده فى الغزل بكلام عمره ما حصل
ونسيتوا دم المذبوحين
مش مكسوفين
يا عاله فوق كتف الزمن
على ايدكم ضاع اسم الوطن وتغنوا غنوه لليتيم
فاكرينها كسوه ولقمته ولا هوان فى مذلته
وانتوا اللى وطيتوا الكريم
مش مكسوفين
اقلامكم ليه اتكسرت وحروفها ليه اتبعثرت
والقدس بيبكى حزين
ليه العيون اتحجرت والكلمه فيكم اتصدرت
على جرح فى غزه وجنين
مش مكسوفين
وطيتوا بالحرف الكريم وعليتوا اسم الراقصين
الف قصيده فى الغزل بكلام عمره ما حصل
ونسيتوا دم المذبوحين
مش مكسوفين
بقلم محمد البلاط
ليست هناك تعليقات:
إرسال تعليق