((تعبت قلبي))
لما أنت ناوي على الرحيل
ليه بتنصب فى الشباك
تصطاد كلام مني بغرابة
وترسم طريق أسمه الفراق
ذنبه أيه قلبي اللي حب
هو ذنبه إنه هواك
الأحبة حوارها يبدأ بالورود والإشتياق
وأنت بادي كل الكلام بالعراك
كنت بتمنى طيوفك
تعبت قلبي أجري وراك
حيرت قلبي يابن قلبي
إحتار دليل دربي معاك
بغير عليك أيوا بغير
بغير حتى من سواك يلمس شفاك
بغير عليك من مضجعك
البرد قاتل والفراش سارق دفاك
كان نفسي أشرب من رضاب كأس الوداد
ليه بتسقيني مر كاس أسمه جفاك
خلاص ياسيدي إرحل ولكن
سيبني أعيش ذكرى هواك
وإن جيت فى يوم تعمل ثواب
إبعت تراب أشم فيه ريحة خطاك
وضعت النهاية م البداية ونثرت ملح
فوق جروح كل أملها كان دواك
الله يسامحك من قلبي بدعي
ربي يصونك ربي معاك
بقلم
نور الدين محمد
٨/٤/٢٠٢٣
ليست هناك تعليقات:
إرسال تعليق