ياللي شغلت القلب بهمسة
وملكتني من أول لمسة
يوم ما عنيك بصيتلي خدتني
ولبر الأشواق عديتني
قلبي ف حبك بان له المرسى
كنت زمان ع الحب بدوَّر
كنت ليلاتي ف شكله اتصور
كنت بنام على حلم مكرر
اني المحه بالعين مش أكتر
لو يرضى إني معاه اتصوَّر
كنت اتمنى يهل ينور
عتمة عمري وهم مسيطر
يروي ف جدب الروح ويخضر
كان أملي اني ألقاه واتحرر
من أحزان كت سجن مسور
شفتك خدني الهوى من ايدي
قلتله فين من بدري يا سيدي
يوم ما هويتني المر اتسكر
ياللي هواك كان ليا بداية
عشت ف قربك أحلى حكاية
كان لي البسمة ومحى دمعايا
هون دنيا معاندة معايا
قاد لي ف ليل الخوف شمعايا
كان للحرمان ويل ونهاية
حققلي معاك كل منايا
وقضيت ع الأحزان جوايا
بدعي ف ليلي واقولها بجد
ربي يديم الشوق والود
وتعيش طول العمر معايا
انت هوايا
بقلمي/ خالد جمال ١٣/٥/٢٠٢٦
ليست هناك تعليقات:
إرسال تعليق