كان قلبي ف حبك متعشم
كان يضحك ليك وانت تجشم
وان قلت بحبك كده على طول
بتقوللي ده عيب يابني اتحشم
دانا عقلي معاك داب واتهشم
والناس من توهتي قالوا مبرشم
وبقيت م الشوق زي المسطول
مضروب ميت علقة ومتخرشم
دانا كنت ف عشقك متوسِّم
ان ابقى العود وانت تقسِّم
وعزفت لحبك ع الأرغول
ولا قلبك حن ولا اتبسم
دانا عشت ف حبك بتألم
ولا قلبك يوم لان ولا سلم
قلت اصبر يمكن بكره أنول
ولا نلت ولا القلب اتعلم
كان آخر الصبر اعيش محزون
خلصته معاك نفد المخزون
لما قالتلي أن فرحها اليوم
وأنا أول حد يكون معزوم
ده يا ريتني ما كان قلبي اتعشم
كان اهون ليا ف أمري أحسم
أصل الهوى مش أحلام بالكوم
ده نصيب مع قسمة بتتقسم
متعشم
بقلمي/ خالد جمال ١١/٥/٢٠٢٦
ليست هناك تعليقات:
إرسال تعليق