( باللهجة اللبنانية المحكيَّة )
هالبنت يلي كنت
بالورد زَيِّن جدايلها،
بوردات من قلبي منقِّيها
غابت الجدايل
وذبلت الوردات
اشتاقت لإيد تسقيها .
متل الغريبة صارت الوردات
لا أهل ، لا أحباب
صار الكل ناسيها ،
كتير كبر الحزن فيها،
يا زمن قلِّي شو ذكَرَك فيها ؟
شو بدَّك أكتب فيك يا عمر ؟
شو بدَّك عن القهر احكيلك ؟
بدَّك قول كنت كتير فرحان؟
بعرف رح تقول عم أكذب
أيام الفرح راحت
وصارت متل دولاب عم يقلب
صرت بعتم الليل إتخبَّى
اتغطَّى بالبرد والجمر قايد
مش مصدِّق ؟
هات ميزانك ، أوزن وشوف
قدَّيش صار الهَمّْ زايد .
يا ما بعَّدت عنَّا أحباب
وياما فرَّقتنا عن الأصحاب
وياما تركتني وحدي
بالعيد عايد .
يا زمن عم تقتل الألوان
اترك لي ولو ذكرى
إرحم حاج تكون جاحد
رجِّع لي جدايلها
اتركنا ماعندي طلب زايد .
كل العصافير بتطير بجناحين
وما بقيلي غير جناح واحد .
د.أنور مغنية 2024 06 06
ليست هناك تعليقات:
إرسال تعليق