انا يحسدك يا حمار
عايش علي البرسيم
برسيم ما لوش ارقام
لا تمانين ولا تسعين
ولا رخصة ولا كاتالوج
ولا بتعمل حوادث
شايل حمول بالكوم
طول النهار دايس
لا شقة في ابراج
ولا عندك حماره عانس
لا قلم ولا كراريس
ولا حمير في مدارس
لا ليك في ضرب السكين
ولا طلقة بمسدس
لا بتحلف طلاق ويمين
ولا حماره بتتنك
كيفك خلاص برسيم
لا حشيشة ولا بودرة
وتحب تشوف الدنيا
دايما تكون خضرة
حمارتك كمان غلبانة
وعايشة علي الخضرة
لا ليها في المكياج
لا احمر ولا بودرة
ولما يضيق الحال
يا تنهق يا بترفس
وعن بني الأنسان
تعالالي وانا احكيلك
اصل بني الأنسان
من طينة غير طينك
عاملين فيها اسود
وعايشين علي. اللحمة
لحمة و سمك و دجاج
اهوا كله بقي لحمة
وياريت كمان فالحين
دا الكل ضرب لخمة
ولما ضاقت حياتهم
والدنيا بقت زحمة
خلاص بياكلوا في بعضهم
ومفيش كمان رحمة
شكلها هناكل برسيم
وننهق و نرفس
انا بحسدك يا حمار
بأربع رجول جامدين
وواقف رافع راسك
يبعتوك من الغيط
للبيت عارف السكة
ظلموك بني الأنسان
وبيعملوك كفتة
بقلم
احمد محمود
من ديوان بنا حروف
ليست هناك تعليقات:
إرسال تعليق