يلّا واحد إتنين تلاتة
حد يرفع السِتار
كلُّه هيشوف عرض أول
شئ في قمة الإنبهار
عرض لكن عرض حصري
تشوفه كل فين وفين
كل مشهد منه يعني
بيحكي أوجاع السنين
عرض أضواء المدينة
يعكس الحزن اللي فينا
مهما تضحك فيه هتلقى
ضحكة مش صافية وحزينة
والعيون دايماً بتسرح
قلب نفسُه بجد يفرح
رغم كل الإنكسار
يلّا واحد إتنين تلاتة
حد يرفع السِتار
صدّقوني العرض تُحفة
وحاجة قمة في الجمال
والجميع كان كلُه لهفة
وكُلُّه صمت مافيش جِدال
كُلُّه شاف في العرض نَفسُه
كُلُّه عاشُه كلُّه حسُّه
والجميع من حُزنه نِفسُه
يبقى يوم قدّ القرار
يلا واحد إتنين تلاتة
حد يرفع الستار
هو عرض بيحكي عني
ويعكس الحزن اللي بيّا
عن دموع جوّة مني
خلف ضحكي متدارية
عمر يوم ما شافها حد
نفسي أفرح يوم بجد
بس يعني الفرح دايماً
فيه ما بينّا ألف سد
كلُه واخد العرض ساتر
يحكي فيه كل المشاعر
كل حزن أكيد له آخر
وكل ليل ولُه نهار
يلا واحد إتنين تلاتة
حد يرفع السِتار
بقلمي عبدالحميد وهبه
ليست هناك تعليقات:
إرسال تعليق