عامي
بقلم: خالد كرومل ثابت
كنت جاي أقولك. كل سنة وانتي طيبة يا أمّي
لكن واقف قدّام بابك. والسكوت كاسرني
بنادي عليكي يمكن صدى صوتي يوصلك
يرجع الصدى في حضني ويقول. الفُراق غلبني
الدنيا بعدِك بقت ليل طويل حوالَيّا
والبيت من غيرك سكون بيوجعني
كل ركن فيه حكاية من حضنك الدافي
وكل حيطة بتسأل. فين اللي كانت تحميني
وحشني صوتك لما تقولي بحنيّة. يا ابني
الكلمة دي كانت حياة تروّيني
كنت لما الدنيا تضيق جوّه صدري
أجري على حضنك وحضنك يداويني
دلوقتي بنادي اسمِك في عز الليالي
والليل طويل ومفيش غير دمعي يواسيني
بيقولوا الزمن قادر ينسّي الجراح
لكن جرح فراقك عمره ما ينسّيني
أنا من بعدِك تايه وسط ناس كتير
بضحك قدّامهم والوجع ساكن جبيني
كل عيد أم بسمع ضحك الناس حواليّا
وأنا العيد عندي ناي حزين يبكّيني
لو كان الدعاء بيوصل للي في سما ربّي
قولي له. ابنِك لسه على بابِك مستنّيني
مستنّي حضن كان أمان سنيني
مستنّي إيد كانت دايمًا تراضيني
نفسي أرجع طفل صغير في حضنك ثانية
وأخبّي دمعي في صدرك وتسامحيني
ولو رب السما جمعني بيكي في يوم
هحضنك حضن العمر. وتحضنيني
وأقولك وأنا باكي بين إيديكي
ليه سيبتيني بدري كده وكسرتيني
مين بعدك في الدنيا يدفّيني
مين بعد حضنك في الوجع يواسيني
لو خيروني بين الدنيا وبين حضنك لحظة
أرمي العمر كلّه. بس لحظة تضميني
وأقول للدنيا لو سألتني عن أماني
حضن أمّي لحظة. وكان يكفّيني
ولو قالوا كبرت وبقيت راجل
أقول. قلبي لسه طفل. وفراقك واجعني
وإن سألوني. إيه أقسى وجع في حياتي
أقول. ناديت يا أمّي ومفيش صوت ليها جاوبني
خالد كرومل ثابت
