ظل لا يختفي بقلم نشأت البسيوني

ظل لا يختفي

بقلم/نشأت البسيوني 

في لحظه غريبه ما بين النهار والليل تلاقي نفسك واقف قدام مرآه ما تعرفش إذا كانت بتعكس شكلك ولا حقيقتك مرآه شكلها عادي بس صورتك فيها مش شبهك وتحس إنك قدام شخص ما بينامش جواك شخص اتكون من كل وجع فات من كل كلمه كسرتك من كل خيبه رجعتك لورا من كل واحد ضحك في وشك وهو بيطعن في ضهرك وتفهم فجأه إن اللي وقف قصادك مش انت بس النسخه اللي 

اضطرت تعيش بدل ما تنهار النسخه اللي اتعلمت تتحمل السكوت والضغط والغدر والقله اللي ما اتعودتش تاخد حقها الا بالوجع وتلاقي انك بقيت ماشي في الدنيا وانت شايل ظل تقيل ما يفارقكش ظل اتخلق من مواقف ما قدرتش تنساها ومن ناس ما استحقتش تبقى في حياتك بس سابوا فيك علامه ما تتمسحش وتدرك انك ما بقيتش الشخص اللي بيصدق بسرعة ولا اللي يتصدم 

بسهوله بقيت الشخص اللي بيبص للأماكن بعين والقلوب بعين تانيه والنيات بعين ثالثه لأنك اتلسعت بما فيه الكفايه لحد ما بقى جواك حساس يشم الغدر من قبل ما يحصل وتشوف التعب عامل ازاي عضمك من جوه وانت لسه واقف كأن الوقفه بالنسبالك بقت واجب مش اختيار وتفتكر ايام كنت بترضي كل الناس وتنسى نفسك وايام ضحكت فيها وانت مكسور وايام اتظلمت وانت ساكت وايام 

اتأذت وانت ما فتحتش بقك لأنك كنت فاكر إن الصبر هيحل كل حاجه لكن اللي اكتشفته إن الصبر لو ما كانش معاه كرامه بيكسر مش بيقوّي وإن الطيبه لو ما كانش ليها حدود بتتحول لسلاح ضدك وتتعلم تاخد بالك من خطواتك لأن الدنيا ما بترحمش اللي ما ياخدش باله وتتعلم تحب نفسك غصب عنك لأن العالم حوالينك مش هيديك قيمه لو انت ما شفتهاش جواك وتفهم إن الوجع اللي 

كنت فاكره نهايه كان بدايه وإن الظل اللي ما بيفارقكش مش لعنه ده علامه إنك اتوجعت واتصلحت واتكسرت واتجمعت وإنك بقت بني آدم نسخه جديده ما حدش يقدر يشوف قوتها غير اللي عاش نفس الطريق وتدرك في الآخر إن اللي بيطلع من الغرق عمره ما يبقى زي اللي ما وقعش أصلا اللي بيطلع من الغرق بيطلع بعيون شايفه وبقلب فاق وروح ما بتتخدعش تاني وأنك رغم كل اللي 

حصل لسه واقف ولسه قادر ولسه فيك ضي صغير مهما العالم حاول يطفيه لسه بينور لك الطريق اللي محدش غيرك يعرف يمشيه