بقلم/نشأت البسيوني
في الليل سر مش بتقوله الشمس في ضوء النهار سر جوا قلبك سر بيرافقك من ساعة ما الدنيا بدأت يحسسك بالوحدة ومع كل نجمة بتلمع في السما بتفتكر حاجات ماحدش يعرفها غيرك حاجات كنت مخبيها من نفسك من الناس من أي حد قريب منك وفي الليل كل صمت بيبقى له صوت كل خطوة كل فكرة كل نفس بتحس بيها بتكبر وبتكبر جواك لدرجة تحس إن الليل بيحكي لك قصصك
قصصك اللي عمرها ما اتقالت وقصصك اللي كانت سايبة أثر جوا روحك وبتدور على طريقة تطلع منها الليل بيعلمك الصبر بيعلمك تسمع نفسك قبل ما تسمع أي حد بيعلمك تقف على رجليك رغم الخوف رغم الألم رغم كل اللي فات واللي جاي وبتعرف إن اللحظة اللي أنت فيها هي اللحظة الوحيدة اللي تقدر تغير فيها نفسك واللي تقدر تحدد بيها طريقك بعيد عن الضوضاء بعيد عن حكم الناس
بعيد عن توقعاتهم بعيد عن كذبهم ونفاقهم وده بيخليك تحس بقيمة كل خطوة انتاخدها مهما كانت صغيرة مهما كانت هادية
وفي الليل بيبانلك مين اللي واقف جنبك مين اللي حقيقي ومين اللي مجرد صورة مش موجودة لما تفتح قلبك للظلام مش للناس لما تسمع نفسك وتسمع وجعك وتحس بأحلامك الصغيرة والكبيرة وقتها بس بتعرف إن القوة مش في كلام حد ولا في تصديق حد
القوة في صوتك اللي محتاج تسمعه أنت الأول واللي محتاج تثق فيه أنت الأول واللي محتاج تحميه هو نفسك مش أي حد تاني
الليل برضه بيعلمك الرحمة بيعلمك التسامح حتى مع نفسك ومع اللي جرحوك بيعلمك تلاقي هدوء في قلبك وسط كل ضوضاء العالم بيعلمك تصالح مع الأيام اللي فاتت وتصالح مع نفسك ومع قراراتك ومع كل اللي حصل حتى لو كان مؤلم حتى لو كان صعب
حتى لو خلى دموعك تنزل وتنسكب سر الليل إنه بيرجعلك القوة بيرجعلك الوعي بيرجعلك ثقتك بنفسك وبتفهم إن كل ألم كل وجع كل خسارة كانت درس مش عجز وأنك قادر تمشي قدام رغم كل حاجة وفي آخر الليل لما تنظر للسماء وتشم نسيم الليل وتسمع هدوءه بتحس إن الدنيا لسه فيها مكان ليك وإن كل حاجة لسه ممكن تتغير وإن كل حاجة ممكن تتحسن وإنك قادر تبني حياتك
من جديد وتختار طريقك وتكمل مهما كانت العواصف اللي حوالينك الليل ده بيخليك تعرف إنك مش لوحدك وإنك قادر على كل شيء وإن صوتك الداخلي هو اللي يهم هو اللي هيوجهك هو اللي هيعرفك قيمتك الحقيقية بعيد عن أي حد تاني الليل مش بس وقت نوم مش بس ظلام مش بس هدوء الليل ده حياة كلها دروس صمت قوة صبر ووعي وبداية جديدة لكل اللي حاسس إنه اتوه أو
تعب أو ضاع في زحمة الأيام وكل اللي محتاجه بس يسمع نفسه ويحس بقيمته ويحس بالقوة اللي جوانه ويحس إن الطريق اللي لسه قدامه فيه نور ولو خطوة واحدة بس كفاية تبدأ منها وكل حاجة هتتغير
ليست هناك تعليقات:
إرسال تعليق