قصيدة: حِلم المدينة الفاضلة
الشاعر: محمد عدلي محمد – شاعر دندرة
عَدل وسلام…
حِلم ساكن جوانا،
بيملا فينا الأمل،
والشمس تبعت سلامها،
تطلّ بابتسامة ضي،
على خدود الورد،
والطير يفرح معانا…
ويغنّي لحن الحياة.
من زمان وإحنا بنحلم،
ببلاد ما تعرفش ظلم،
رفعوها الحكما للسما،
وزرعوا فيها القيم،
رسموها لوحة مبهجة،
وسموها مدينة الجمال.
وييجي العصر الفريد،
ويهلّ مع الفجر عيد،
تسطع مدينة هُدى…
أرض أحياها الرسول...
نور تجلّى للخلود.
كانت نارٍ من جهنّم…
المرض فيها طوفان،
فالسعادة جاتها تجري...
بعد صبر وليل مرير...
نبينا هاجر للمدينة…
نوره أشرق بالعمار.
على باب المدينة…
كتب التاريخ بالدهب،
المسلمين مع الرسول…
واقفين صفوف للصلاة،
بهم تأسّوا… نسجوا أمّة،
إيد بإيد… قلب واحد،
عزمهم كان معجزات.
والنهارده…
بعد الضِعف والهوان…
حِلمنا باقي ما ماتش،
لسه قادر يتولد…
طول ما النبي موجود…
ونوره ساطع ع الوجود…
وساكن جوّه في القلوب.
يا أمّة الخير… انهضي!
ارجعي للمجد… عودي،
جددي عهد الصحابة…
خلّي حياتنا يوم جديد،
تبقى مدينة فاضلة…
تنَوّر لينا بالسلام.
ليست هناك تعليقات:
إرسال تعليق