انا بنا حروف
ارص الحرف جنب الحرف
تبقي كلمه
وارص الكلمه جنب الكلمه
يبقي بيت
وارص البيت بعد البيت
تبقي مدينه
قصدي قصيده
ويقولولي مبروك
وصح لسان الشاعر
وتنزل عليا الشهادات
والتكريمات كلها ورق
يااخوالنا انا عل الحديده
الشعر ما بيأكلش عيش
ودايما الشعرا تعبانين
حتي اسألوا
بيرم ونجم والخال
وكمان عمنا جاهين
مافيش حاجه نقديه
حتي لو الورقه ام مادنه
الحته ام ميه
افصل هدمتبن حلوين
احسن من اللي عليا
واروق علي ام العيال
واجيبلها طرحه وجلبيه
واجيبلها كمان خلخال
واشبرق عل العيال
واجهز البت سعديه
وادفع قسط التلاجه
ونشرب ميه ساقعه ياعنيا
وازرع قيراطين خضار
اصل العيشه غاليه نار
ياعم انت بتسرح بينا
كل ده بالورقه ام ميه
اه سامحوني ياولاد
اصلي نسيت اقولكم
انا مواليد
الف وتسعميه
الزمن الحلو اللي فات
والعيشه الحلوه الهنيه
ماحلاها عيشة الفلاحه
ام طرحه وجلابيه
وسلامتكم
انا مش شاعر انا
بنا حروف
بقلم
احمد محمود
من ديوان سكة العاشقين
ليست هناك تعليقات:
إرسال تعليق