قصة حياتك إنت إكتبها بإيديك
جُملة جُملة وحرف حرف باللي فيها
علشان أكيد لو حد تاني كتبها ليك
هتعيش حياتك كلها مجبور عليها
دي حياتك إنت ومش تخّص حد تاني
حافظ سطورها أكيد وترجمة المعاني
صدّقني لو فيه حد غيرك قصّهالك
هتعيش باقية العمر كله أكيد تعاني
إكتب بإيدك كلمة كلمة وسطر سطر
دوّن ساعات الحلو فيها وأي مر
دوّن كمان وقت الهزيمة وأي نصر
أي فرح وأي لحظة بتعانيها
قصة حياتك إنت إكتبها بإيديك
جملة جملة وحرف حرف باللي فيها
إكتب بنَفسك مش لحاجه دَه عشانك
وإياك في مرة تِعتمد على حد غيرك
لو جَه في مرة وقال تعالى أكتب مكانك
لا قولّه شكراً يعني كتّر ألف خيرك
دي حياتك إنت أكيد وعارف محتواها
إزاي تسيب ناس تانية تكتبها بهواها
لو يكتبوها مش هتبقى دي حياتك
وحياتك إنت خلاص من الواجب عزاها
وقت الكتابة كُن قوي وسيد قرارك
أصل التاريخ ماذكرش حد م الطيبين
لو كنت فعلاً يعني مجبور في إختيارك
هتقضّي باقي العمر فعلاً بين نارين
إفهم ملامح قصتك وإختار مصيرك
حاول تحدد م البداية خط سيرك
وبدال ما تبقى إنت الأسير لحد تاني
بعقلك إنت الكون بحاله يكون أسيرك
بقلمي عبدالحميد وهبه
ليست هناك تعليقات:
إرسال تعليق