اتحدى الكون كمل حلمك
قوم غني وطير
وارسم صبحك لو زاد جرحك
ان شاء الله يكون بالطباشير
الدنيا هاتعند وتأوحك
وهتلقي في سكة مشوارك
مرشوقه في رجلك مسامير
وهتلقي كلاب تنهش لحمك
وتشق في عضمك مناشير
إياك تتنازل عن حلمك
أو تفضل في الحزن اسير
واضحك من قلبك لو باقي
كام لحظه فعيش بيها وطير
الدنيا ان ضحكت بتسلم
دقنها وبتقلب حناطير
مش فارقه ان كانت بتعلي
في بهايم أو حتى حمير
فامسك في الأمل اللي معدي
لو قلبت وياك امشير
الدنيا بتفرم في الواقع
وتدوس على هز الغرابيل
وبتاكل وفي لحم غلابه
نايمين على شمع وقناديل
وبتصلب أحلامهم دايما
على مسرح مليان تمثيل
وان عدي الفجر بيسبقهم
على شان راكبين هما الفيل
وتلم الكومبارس في اوضه
وبتبدأ فيهم تقتيل
اتحدى الكون يمكن توصل
وتلاقي في قبرك منديل
وتلاقي الحلم هناك قبلك
قاعد وفي ايده الازميل
.................
اشرف الشناوي
شاعر عاميه
البرامون
المنصوره
ليست هناك تعليقات:
إرسال تعليق