راجع بعد الغيبة دا هيه
جاي تطمن ع الأحوال
بعد ما سبت جراح وأسية
بعد ما بختي ف حبك مال
بعد ما عشقك بكَّى عنيا
صِعِب الدمع عليها وسال
بعد ما قمرك فات لياليا
بعد ما صال ف سماها وجال
بعد ما همسك بقى نوح فيا
بعد ما كان غنوة وموال
راجع لاجل ما تشمت فيا
لا يا حبيبي أنا عال العال
كل اسايا اتبدد فيا
كل الغيم من بعدك زال
حتى الروح بعديك مرضية
مش محتاجه لأي سؤال
أما خيانتك غدرك بيا
هيخلصها زمان لو طال
هيرد الحق في يوم ليا
أصل ضياع الحق محال
راجع ليه وبتتعب نفسك
كان يكفيك تبعت مرسال
قلبي اللي انت خدعته وحسك
مش هيعيش بهواك رحال
عمر ما يومك هيكون أمسك
عمر الجفا ما هيبقى وصال
بقلمي/ خالد جمال ١١/١٢/٢٠٢٥
ليست هناك تعليقات:
إرسال تعليق