بقلم/نشأت البسيوني
في ناس ما حدش بيشوفهم وهما بينهاروا ما حدش يسمع صوت تعبهم ولا يشوف دمعة في عينهم ولا يلاحظ لحظة سقوطهم لانهم اتعودوا يشيلوا نفسهم بنفسهم من زمان اتعودوا يقفوا لوحدهم ويتماسكوا لوحدهم ويعالجوا وجعهم من غير ما يستنوا ايد تمد لهم الناس دي غالبا اتوجعت كتير لدرجة خلتها تبطل تعتمد على حد خلتها تعرف ان الدعم الحقيقي ما يجيش دائما من اللي حوالينا
ساعات يطلع من جوه القلب نفسه من مكان محدش يوصله غيرهم هم بس يمكن عشان كده تلاقيهم ثابتين حتى لما الدنيا تهز كل شيء فيهم دول ناس لما يطيحوا ما يستنواش اللي يرفعهم ولما يحزنوا ما يدورشوا على كتف ولما يتعبوا ما يدوروش على حضن يريحهم يمكن يتمنوا ده بس ما يطلبوش لان صوتهم الداخلي بقى اقوى من كل الاصوات صوت يقول لهم قوموا كملوا ما فيش وقت
للانكسار الناس اللي دايما شايله نفسها مش جامده زي ما الناس تتصور هي بس عايشه بقلب تعلّم يضمد نفسه بيده ويربت على روحه لما تتعب ويعيد ترتيبها لما تتشتت ويلمها لما تتبعثر من مواقف ما حد يعرف عنها حاجه هم ناس لما يرحل منهم حد ما يعملوش ضجه ولما يخسروا علاقه ما ينهدوش ولما يتعرضوا للخيانه ما ينتقموش بالعكس ينسحبوا ويعيدوا بناء نفسهم بهدوء
كأنهم بيقولوا للعالم كله ان اللي يضيع منهم يتعوض وان اللي يتكسر جواهم يتصلح وان اللي يبعد عنهم ما كانش ليهم
وفي كل مرحله من مراحل حياتهم يثبتوا لنفسهم قبل الناس انهم اكبر من وجعهم واعمق من خذلانهم واصلب من دموعهم يمكن يتعبوا يمكن ينهاروا جوا لكن ما يسمحوش لحد يشوف ده لانهم يشوفوه نقطه ضعف يخافوا يبانوها قدام حد ما يستحقش
وفي الجانب اللي ما يشوفهوش حد تلاقيهم اقرب الناس لربنا اكترهم دعاء اكترهم صدق اكترهم نوايا نظيفه لانهم اتعلموا ان كل اللي معهم بالحياه ممكن يروح لكن رب العالمين ما يسيبهمش لحظه يكسبوا حاجه ما حد سهل يمتلكها يكسبوا نفسهم يكسبوا صلابتهم يكسبوا هدوءهم يكسبوا قلوبهم اللي ما بترجعش زي الاول لكن ترجع اقوى انضج انقى دول هم الناس اللي شايله نفسها واللي مهما الدنيا لعبت فيهم عمرها ما هتوقعهم
ليست هناك تعليقات:
إرسال تعليق