گالولي صرت زين
واتحسنت احوالك
اي مبروك
وريت العافية داير مدارك
گالولي بطلت السهر
بطلت تسولف عالگمر
وكلها اتگول متعدل
وهنيال الخذاك وهنيالك
گبل كلش گبل تحبني
وغيري ما يخطر ابالك
شكثر خرزات منك لظمناهن
كل خرزة بألف دمعه لظمنالك
لاموك وگلت معذور بدنياه
گبل جنت اتخاف من اخيالك
وهسه وي تفاهة ناس بايع
ديوان العشگ والگهوة وادلالك
أنه مريضهن اتريضه اهمومي
واعرف اجروحي حيل تحلالك
يلمزركش فرح بنجوم ليلي
ومشگبن إگليب بجروحه تعنالك
اعرف تتونس بهضمة روحي
ثاريك على روحي شايف حالك
كلنه ولد تسعة وعگد سرة
على شنهو گلي زايد دلالك
تريد اترد لا ترد أبمنيه
لا وحگ عيناك
ما بچيتك يتراولك
بچيت اسنين چذابة وأخسرتهن
وعميت اعيون تعبني بخيالك
18/01/2022
العـ عقيل ـراقي
ليست هناك تعليقات:
إرسال تعليق