ديل حُصان
و شب عامل ديل حصان
والأنسيال مع سلسله
من بنطلونه الشورت بان
بشكل يقرف مسخره
حُلقان لابسها فى الودان
ورقع هدومه مهلهله
علطول بيندغ فى اللبان
بِرُوج شفايفه مزنهره
على وشه تلقا إيه كمان
رسم حواجبه مسطره
حَاَوالين رقبته حتى بان
وشم مرسوم منظره
وفيه نشوف حيه وتعبان
بطول قفاه متنتوره
وعليه ماشيه آخر جنان
خطوه أمام واتنين وره
وفى الكلام بتلاقى حنان
زى بنات دا إيه جره
نايم النهار والليل سهران
نت وبلاوى مجرجره
دول صبحوا قدوه للشبان
معا إنهم دول معيره
لو إحنا قولنا ليه دا كان
يقولوا ناس متحرره
فين شبابنا من الجدعان
ويا الرجوله المفخره
وفين أخلاقنا من الأديان
وكمان عقول متنوره
وأيادى يِعلا بيها البنيان
للى جاى متحضره
ساعتها نبقا بخير وأمان
نكتب تاريخنا بمقدره
محمد عنانى
ليست هناك تعليقات:
إرسال تعليق