الدنيا ليها أحوال بقلم أشرف محمود عيسى

الدنيا ليها أحوال بتلف بالناس حتة لفة.

بتخلي الواطي عالي وبالعكس سبحانه بيغير الأحوال والهيئة..

  فهيمة بنت يتيمة صغيرة حلوة ودمها خفة. 

الكل طمعان فيها وهي عندها شرف وعفة.

داسوها الناس بظلمهم وحولوها لفوفه..  

الله يرحم أبوكي إللي عمره ماشاف الكفته..

وكان أشيك طقم عنده فلنة بلباسها البفته.

وكان راس ماله جميز بيبيعه في قفه.

دلوقتي شايفة نفسك وغيرتي إسمك من فهيمة لفوفه..

بتشاوري للناس من طراطيف صوابعك المدهونةمانيكير.

وتسلمي ع الناس وانتي لابسة الحتة الزفرة

راكبة عربية موديلها مش عارف أقراه بس أكيد بفلوس كتير..

بتيجي في الأعياد وتفرقي لحمة وفطير.

وتخلى الناس تتجنن وتقول سبحانه يعطي بلا تقتير..

بتخشي علينا الحارة وانتي لابسة الحتة الزفرة..

ومقضياها في البارات وبتدعي العفة.

وإن جه حد يسلم عليكي تتأففي وتقولي سوفاج على أهل الحتة..

يرحم زمان كنتي مدا يدك بالسؤال في كل ميتم وزفة.

سبحان المعز المذل فستان وشنطة كلاس بدل الطرحة والقفة..

ودول اتنين على الفيس والهيئة مخفية.

بيقولها أبويا مليونير وتقولوا أمي ست ثرية.

وفي النهاية تطلع بنت عم بشير غفير الشرطة المدرسية.

وهو أبوه راجل فقير بيكمل عشاه نوم وبيحلم بحتة طعمية. 

ودا شاعر بيقول كلمة جميلة.

بيناجي الليل ونجومه ومابيده حيلة.

محدش قراله ولاهيقرا له لا قصيدة ولاحتى أغنية .

ولما هلس وكتب كلام خدوه وضربت الأغنية.

 بعد ماكان العشا ترمي بقت المزة لحمة مشوية.

وبقى ليه في كل غرزة موال وأغنية..

وقالوا عليه شاعر واتعمله أمسية. 

هي الدنيا كدا تهلس فيها تعيش بحنية.

الدنيا لها في حياة الناس ألاعيب. 

لاعاد الصح صح ولا العيب عيب.

ماعادش الصغير يحترم الكبير ياتري بكره في إيه كمان محدش يعلم الغيب.

أشرف محمود عيسى