حيرة و فكر و قلة نوم
جوه عينيها كلام مكتوم
لو بصيت فى عينيها بلاقي حاجات
بلاقي سكات
وأفضل مستني إنها هتقول
لساعات ..
يمكن مكسوفة تكلمني
أو يمكن خايفة تزعلني
بكلام يوجعني و يإلمني
شايف فى عينيها ليل طويل و عتيم
وقمرة مداري عليها الغيم
وسحابة حزينة بتشكي أنين
غلطانة يا قلبي
وليه حابسة دموعك جوه العين
أنا بيني و بينك عشرة عمر سنين
أنا بيني و بينك
جسر و بر و بحر و سر دفين
ليه تعملي سد ؟
ليه ترفضي إيد تتمد ؟
هى حكاية و راح تنفض ؟
ده إحنا ميراث ووثيقة و عهد
صعب عليا أشوف ضحكها
من ورى قلبها
صوت ضحكها منبوح بيداري جروح
من كتر همومها وغلبها
صعب أعدى كأنى يوم وخلاص بيمر
ياما قابلنا صعاب عيشناها مع بعض
حلو و مر
ياما إستحملنا و إتحملنا
ولا مرة شكينا لحد
ياما مرينا بأزمات
لو شالها جبل ينهد
أنا عارف إن الحمل عليكي ثقيل
و إنك إستحملتيني كتير
وحبك ليا كفيل
وأنا واقف زى العاجز مشلول
حتى كلامي مش مقبول
و أنا عارف إني أنا المسئول
عن كل ألامك
بس ألامك هى ألامي
و خوفك شئ بيهز كياني
و قلقك سكين بيقطع أحلامي
بند ما بينا مش إلزامي
و لما بحاسب نفسى
بلاقي إنى كمان مظلوم
مش ذنبي إنى كنت بصوم
عن ذاتي و عن نزواتي
علشان حكايتنا تدوم
كان حلمي أبنيلك قصر جميل
حواليه أشجار و زهور و نخيل
كان نفسي يكمل الألبوم
و أنا لو بإيدى
كنت قطفت بإيدى نجوم
و هديتك بيها
كل ليلة و كل يوم
كلمات
هانى فتوح
ليست هناك تعليقات:
إرسال تعليق