سكان الجبل
٠٠٠٠٠٠٠٠٠٠
قلب الجبل حاضن حكايات
عشق وشجن ومظالم وأهات
بشر من نظرتهم بيتكلم الخطر
بشر من حدتهم بيتألم الحجر
ظالمين اه وألف مظلومين
ومن حرقة الايام والسنين
شاربين احزان وحرمان المطر
سكان الجبل
بين التعالب والديابة والتعابين
عايشين وعاشقين وحدة السكات
قلب الجبل حاضن حكايات
ومين يسمعهم يابوي
ومين يصدقهم يابوي
ومين يرجع للشريد الأمل
سكان الجبل
صرخة الليل جات
معاها عويل الديابة
وقوة وظلم الغابة
وتوهة السبع لفات
ف أفكارهم ف حزنهم ع حالهم
ف أحلامهم وحرمانهم من احبابهم
ازاي ياجبل يرخص الغالي
وتحصد العلل الاصل العالي
ودوري ياكوباية الشاي ع الرجال
واروي كيف اتبدل الحال من حال
اللي سكن الجبل
ولبس عباية البارود والرمال
اما ضحية حواء كسرت قلبه هو
اما ضحية سلطة وجاه وراس مال
وازاي بكت الغنيوة ياخال
بكت ع اللي ضاق رزقه
وذاق الحرام قوام عشقه
واشترى الليل وباع نفسه
وف قلب الجبل اتكتب اسمه
مع أولاد الليل الاشرار
قولي وحياة ابوك ياخال
مين الظالم ومين المظلوم
قال الظالم هو اللي معلمناش
ف بحر الحياة ازاي نعرف نعوم
والمظلوم هو الغرقان المهموم
اللي رزق قوته يوم ب يوم
وراضي ب نصيبه وبخته مال
وبكت الغنيوة واتكلم السكات
عشق وشجن ومظالم وأهات
قلب الجبل حاضن حكايات
سكان الجبل
بقلم على عبدالرحيم محمد
ليست هناك تعليقات:
إرسال تعليق