كيف بدنا نتابع بهالوضع كيف
والوضع عن وضعنا صاير كفيف
والهم يبرم حولنا داير مدار
حتى الهوى منستنشقو مانو نضيف
...
بكل مطلع شمس في نكبة
وبكل فسحة أمل في كذبة
وبكل تكة شي ألف ضربة
مناكلا شي تقيل وشي خفيف
....
وشعب جلدو عالجلد تمسح
عن جد بحكي وماني عم إمزح
صرنا للعيان القدر مسرح
مابيميز الممثل من الضيف
......
والشعب ذالينو بحسرة بلقمتو
وماحدى حاسس بكبر مصيبتو
الشعب الأبي العمالة نقلتو
من قصر الكرامة لسجن مخيف
.....
بكل ساعة بتتغير الأسعار
مشعللة ومشرقطة ومهبهبة بالنار
لعبة حقيرة لعبة التجار
بلقمة عيشنا بيتلاعبوا ع الكيف
....
ماشية عالسكت لا من شاف ولادري
والكل ميبيع فينا ويشتري
يازمان اللي درج فيك الكري
واللافتة مكتوبة عاضهر الضعيف
.... بقلمي الشاعر عيسى وسوف باظة
ليست هناك تعليقات:
إرسال تعليق