إياك تتردد أو مرة ترجع في قرارك
وبلاش تتراجع من تاني وكمّل مشوارك
إمسك في الحلم اللي حِلمتُه علشان توصلُّه
لو حتى هتتعب وتواصل ليلك بنهارك
حدّد أهدافك وإرسمها في طريق قدامك
علشان تتمكن وتحقق دايماً أحلامك
كل اللي عانيتُه أو شفتُه بقى وقت علامك
راح تنساه كله أكيد يعني بعد إستقرارك
إياك تتردد أو مرة ترجع في قرارك
إياك تيجي لحظة عليك فيها تندم وتسلّم
أو ترفع فيها الراية خلاص وتقول هستسلم
كل من حقق أحلامه كان لازم يغلط
لكن من غلطُه أكيد يعنى صحّح وإتعلّم
مش عيب إنك تغلط مرة وتبدأ من تاني
العيب إنك تفضل تندم على شئ وتعاني
ياما ناس في حياتها عشان توصل وقعت كام مرة
لكن علشان يعني هدفها قامت في ثواني
صدّقني عشان تقدر يعني لأهدافك توصل
إياك تتردد أو إنك للحلم تأجّل
وإن جيت ولاقيت في طريقك شئ واقف قدامك
خلّيك في طريقك وإتجاوزه ولابد تكمّل
طول ما إنت لحلمك صدّقني بتحاول تسبق
و ف نَفسك دايماً طول عمرك واثق ومصدّق
هتلاقي الصعب أكيد دايماً بقى سهل قصادك
وتلاقي الحلم اللي حِلمه فجأة بيتحقق
بقلمي عبدالحميد وهبه
ليست هناك تعليقات:
إرسال تعليق