ضحكة بريئة ومش مقصودة
بس جميلة وصوتها جنان
بانت جوه عينيها السودة
وفجأة إنتشرت في الأركان
ضحكة بصوتها الهادي مسمّع
خلّت يعني عينيها تدّمع
كله أكيد على سحرها أجمَع
م الناس اللي كانت موجودة
ضحكة بريئة ومش مقصودة
ضحكة بريئة وهادية وصافية
فيها كتير رقّة وإحساس
و ف بساطتها كانت كافية
تخطف كل قلوب الناس
ناس صبحت م الضحكة تعاني
نفسها تسمعها لثواني
ولّا تشوفها أكيد من تاني
لحظات حتى ولو معدودة
ضحكة بريئة ومش مقصودة
مش عارف فعلاً بصراحة
لو مقصودة هتعمل إيه
هتنسّينا طعم الراحة
وكل اللي إحنا بنحلم بيه
ضحكة مافيش كده منها إتنين
حاجة بجد تسُر العين
تملَى القلب بشوق وحنين
ويا بخت الناس الموعودة
ضحكة بريئة ومش مقصودة
بقلمي عبدالحميد وهبه
ليست هناك تعليقات:
إرسال تعليق